كان دايما ساعته المشغولة بترتيل الفجر
بتسامر مغرب يومه المطحون
كان كل سكون بيعدي علينا
بياخد مني ومنه كتير
موضوع التعبير
اللي كتبته في يوم عن كتفه المخلوع من مكن المصنع
لما اصحابه جابوه ع البيت
نظرة عينه منعت عيني ساعتها تدمع
كان لازم يرجع علشان يقراه
مسامير المكنة وتركيبها شغلاك للآن ؟!
ازاي سايبينك فوق تشغل وقتك
وتسيبني استناك ..
زي زمان
طب عايزة كمان
فتجيب لي العود علشان يعني ما اشعرش بحزن
بنتك ياحبيبي
مش ست الحسن
زي انت ماكنت بتتخيلها مابين السمر زمان
في غيابك
انا والمر اصحاب
وعشان روحك ماتحسش حزن
يوميا انا والعود
بنزغزغ في الايام علشان تضحك
إيه رأيك
ابعت لك موضوع التعبير تقراه
جايز يفتح نفسك ..... فتعود