ضبط أمورك يا خبير الحوره
والبس من الوان المسا ديجوره

ناد اخوياك الجن واستحضرهم
ومن المدر مبخرك زيد بخوره

ودي   يا باصر    أجتمع    وياهم
آشوف عالمهم واخوض بحوره

يا سوميا ...يا نسله اللي بعده
عن مجتمعكم ودي آخذ صوره

أجدادنا قالوا ربيتوا معهم
وحصونهم بيدينكم معموره

يا كم سمعنا عن قصص في بهلا
مرويه او وسط الكتب منثوره

من ما سمع بالضبعه وراكبها
أسطورتن بين العرب مذكوره

كيف الحياه ف جزؤكم م العالم
هل كل واحد قايمٍ في دوره

وش حكمكم لو شذّ منكم واحد
مره تعنّت واعتلاه غروره

أحنا البشر ناكل بعضنا بعضا
الغصن ينكر تربته وجذوره

ما نتفق إلا على المكابر
وما نلتقي الا نسوي هوره

من هب صاير في مجاله عنتر
ومن دب سوا  من نفسه اسطوره

والله يخلي إعلامنا ما قصّر
كل يوم واحد صورته منشوره

هذا خطيرٍ ف الفضا وعلومه
ونفسه يطلع م البحر بلوره

هذي تخصص تربية موسيقى
واليوم في مشفى العظم دكتوره

وذاك الدهيري صار فجأه شاعر
ينشر قصايد كلها مكسوره

الا على طاري الشعر شمهورش
عندي طلب في حاجةٍ مقدوره

من حاشيتك أبغي وريث لمدرك
بن واغم مْن الهوبر المشهوره

والا وريث لصاحب الذبياني
هاذر وباقي الحاشيه معذوره

ياخذ بيدي في خضم الهيجا
ونعلن على الساحه انقلاب وثوره

يلهمني أحساس الشعر في عبقر
في شعبته في خربته في غوره

ايغنّملّي من دلال المعنى
شعرٍ مبّهر بالسجع والصوره

شعرن يناطح من جماله فطحل
يكسر قرونه ويسلبه حنجوره

شعرن يعلم عابدين الشهره
زمرة كلاب تلاهثت مسعوره

كم من شويعر صار فيها قامه
وكم قامةٍ يا للأسف مغموره

ولو كانت الشهره تخلّد أنسي
ي هل الطرب ما ماتت الشحروره

ويا شمهروش آنا تراني شاعر
أشرب جزيل القاف من ماسوره

واهبش من أصناف اللحوم وغيري
بطنه من التكرار فيه زعوره

تلهمني وساع العيون أفكاري
ويشعل فتيلي طلّة الغندوره

أتقبل الآراء و  آقدرها  !
ابشرط شخصي م اتجاوز سوره

واللي دخل في منطقه محظوره
يدّه قبل لا  يمدها مبتوره   !!

حنّا عرب نزبن  قليل الحيله
قادر وقاصر قاطره ومقطوره

وان طاح واقف طاح منا و فينا
نحزن لحزنه ونبتهج لسروره

لكننا ع اهل الردى نيرانن
تفني اليباس ولا تبقي خضوره

ويا ساحة الشعار جيتك غازي
شاعر من العويا وله جمهوره

فيدي كند موروث من جداني
لي ف الوغى راياتهم منصوره

واذا نشدتو محزمي عمّاني
وش قيمة الشكري بدون شكوره

ماخذ من الدنيا دروس وادري
العذق ثمرة إجتهاد الزوره

والعسكري لو ينذكر بالهيبه
ما يكسب الهيبه بلا طابوره

مليت من حضن الغروب وبشرق
والصبح ماهو صبح لولا نوره

مليت أشوفبك الوجوه أنفسها
صرتي لقله دوننا محصوره

شاعر يبخشش هافيين القيمه
يعني الجماعه كلها مأجوره

وشاعر شعره الوصخ مثل اهدافه
أقصى طموحه... يطلع بهامووره

خمسة قصايد بس معنى واحد
ويعيدها كلما يحين ظهوره

تركيب لا يسمن ولا هو يغني
مثل البيوت الخاويه المهجوره

واللي يفحم ف الدقايق الاولى
ما يقدر يبدع فلعب الكوره

لا بد من إصلاح في هيكلتك
يا الساحه ومنتي أبد معذوره

ويا شمهروش الحين عاذرناكم
طوّل كلامي وادمحولي قصوره

اشوف خيطان الشمس تتبادى
وتكسي على اطراف الارض كندوره

وانتو تحبون العباه السودا
تهوو من الوان المسا ديجوره

ــــــــــــــــــــــــــــ

* شاعر عماني
ـ بدأ بكتابة الشعر في سن مبكرة وحرص على البحث في الشعر الشعبي .
ـ بداية مشاركاته في الساحة الأدبية كانت بعد مرحلة الدراسة الجامعية عام 2015 .
ـ يحمل شهادة البكالوريوس في تعليم اللغة الإنجليزية لغير الناطقين بها.
ـ حريص على تحري الجودة في الكتابة وضد التكرار .
ـ شارك في العديد من الأمسيات والمهرجانات الشعرية، كان أحدثها أمسية شعرية في مجلس الحيرة الأدبي في الشارقة.
ـ من أبرز قصائدة
- الحورة
- نبوءات عرّاف
- سبعٍ عجاف