وحياتِك
م انا كاتبة تاني .....
 ولا قايلة كلمة بحبِك
ولا غاسلة وشِك بأيدي
ولا صبّه روحي ف قلبك
ولا عامله شعرك جدايل
ولا حتى ديل الحصان
انا حظي ف الحُب مايل
وعرفة ده من زمان....
طب فاكره لمّا اندهشتي
من بسمتي للزحام، وللضغوط والغلا
وكسرة الأحلام ....
وتقولي: زعلانة؟ ؟؟
أقول : ولا حاجه...

لحّد يا طيبه،
م بقينا ولا حاجة
باكيه عيون العيال م العوزة والحاجة
واقفين ف آخر الصف وعطشانين للكلام
متململلين م الصبر
وانتِ كده مالك؟
م تلملمينا بأه وتحضني عيالك
م تثوري ع الأحزان
واهو انت عرفانا
وقت الشدايد إيه!!
بتدّمَعي؟؟
طب ليه؟
سامحيني لو لُمْتك
أنا أصلي صبري قليل
طب انت بس اصبري
وهنعدِّل احنا الميل
حتمًا هتيجي الشمس
مهما يطول الليل
تعالي نفرد سوا
شعرك على ضهرك
شايفة
اهوو بيطير..
والله لا افضل احبك
وبُكْرة راح تبقي غير
يا مصر يا عفيّة
قوومي.... صباحك خير